Azərbaycan Tibb Universitetində (ATU) 2026/2027-ci tədris ilinin başlanması ərəfəsində Rektoryanı Şuranın ilk iclası keçirilib.

ATU-dan Aztibb.az-a verilən xəbərə görə, iclasda universitet rəhbərliyi, struktur bölmələrinin rəhbərləri, fakültə dekanları və dekan müavinləri, şöbə müdirləri, eləcə də digər məsul şəxslər iştirak ediblər. 

İclası giriş nitqi ilə açan Azərbaycan Tibb Universitetinin rektoru, professor Gəray Gəraybəyli gündəlikdə duran məsələlər barədə məlumat verərək yeni tədris ilinə hazırlıq prosesinin əsas istiqamətlərini diqqətə çatdırıb. Rektor iclas çərçivəsində 2026/2027-ci tədris ilinin payız semestrinə hazırlığın mövcud vəziyyəti, yeni qəbul olunmuş tələbələrin universitetdə qeydiyyatının nəticələri, tələbə kontingenti ilə bağlı məsələlər, 2025/2026-cı tədris ilinin məzunlarına elektron diplomların təqdim edilməsi, eləcə də digər mühüm məsələlərin nəzərdən keçiriləcəyini vurğulayıb. 

Gündəliyin ilk bəndi ilə bağlı Tədris departamentinin rəhbəri, dosent Kamandar Yaqubov çıxış edərək yeni tədris ilinə hazırlıq çərçivəsində həyata keçirilən tədbirlər, mövcud vəziyyət və qarşıda duran məsələlər barədə ətraflı məlumat verib.

Ardınca fakültələr üzrə hazırlıq vəziyyəti müzakirə olunub. I Müalicə-profilaktika fakültəsinin dekanı Elşad Novruzov, Stomatologiya fakültəsinin dekanı Elmira Əliyeva, Hərbi tibb fakültəsinin rəisi Məharət Rzayev, II Müalicə-profilaktika fakültəsinin dekan müavini Sevinc Məhərrəmova, Əczaçılıq fakültəsinin dekan müavini Esmira Hacıyeva və İctimai səhiyyə fakültəsinin dekan müavini Nailə Məmmədova təmsil etdikləri fakültələrdə 2026/2027-ci tədris ilinin payız semestrinə hazırlıqla bağlı görülmüş işlər və mövcud vəziyyət barədə məlumat veriblər. 

Məruzələr dinlənildikdən sonra müzakirələr aparılıb, yeni tədris ilinin qarşıya qoyulan hədəflərə uyğun təşkili ilə bağlı fikir və təkliflər səsləndirilib. İclasın gündəliyində yer alan digər məsələlər də ətraflı nəzərdən keçirilib və onların hər biri üzrə səsvermə yolu ilə müvafiq qərarlar qəbul olunub. 

İclasın yekununda çıxış edən rektor, professor Gəray Gəraybəyli yeni tədris ilində universitet qarşısında duran prioritet vəzifələrə toxunaraq, tədris prosesinin yüksək səviyyədə təşkili, idarəetmənin səmərəliliyinin artırılması və tələbələr üçün əlverişli akademik mühitin təmin olunmasının vacibliyini vurğulayıb. 

Rektor aidiyyəti struktur bölmələrinin rəhbərlərinə yeni tədris ilinin uğurlu başlanması və tədris prosesinin fasiləsiz, keyfiyyətli və səmərəli təşkili ilə bağlı müvafiq tövsiyə və tapşırıqlarını da verib.