ABŞ-ın Dana-Farber Xərçəng İnstitutunun alimləri insan genomunda milyonlarla il əvvəlki virus infeksiyalarından qalan genetik elementlərin müəyyən hallarda xərçəngə qarşı mübarizədə immun sisteminə kömək edə biləcəyini aşkar ediblər.

Aztibb.az "Cell" jurnalında dərc olunan tədqiqatın nəticələrinə diqqət çəkib.

Araşdırma böyrəyin ən çox rast gəlinən bədxassəli şişlərindən biri olan işıqqeyri (clear cell) böyrək hüceyrəli karsinoması üzərində aparılıb. Məlum olub ki, bu xəstəlik üçün xarakterik olan VHL geninin mutasiyası zamanı hüceyrələrdə qədim viruslardan qalan endogen retroviruslar aktivləşir.

Tədqiqatın müəlliflərindən doktor Ketrin Vunun sözlərinə görə, bu retrovirus elementləri insanın uzaq əcdadlarının keçirdiyi virus infeksiyalarının genetik izləridir.

Alimlər müəyyən ediblər ki, bu virus genləri aktivləşdikdə xüsusi zülallar sintez olunur. Xərçəng hüceyrələri həmin zülalların parçalarını öz səthində nümayiş etdirir və bu parçalar immun sisteminin T-limfositləri üçün bir növ "siqnal" rolunu oynayır. Nəticədə T-hüceyrələri şişi daha asan tanıyaraq ona hücum edə bilir.

Tədqiqat müəllifləri hesab edirlər ki, bu mexanizm bəzi böyrək şişlərinin nadir hallarda öz-özünə geriləməsi (spontan reqressiya) fenomenini izah edə bilər. Belə hallarda immun sistemi bədxassəli hüceyrələri xarici müdaxilə olmadan məhv edir.

Alimlər vurğulayırlar ki, bu nəticələr hələ fundamental elmi tədqiqat mərhələsindədir və klinik praktikaya tətbiq olunmur. Bununla belə, gələcəkdə qədim virus genlərindən yaranan bu "siqnallar" xərçəngə qarşı yeni immunoterapiya üsullarının hazırlanması üçün perspektivli hədəf ola bilər.