Virtual əməliyyatöncəsi reabilitasiya (preabilitasiya) xidmətləri bazarının həcminin 2034-cü ilə qədər 680,7 milyon dollara çatacağı proqnozlaşdırılır.

Aztibb.az xəbər verir ki, analitiklərin məlumatına görə, 2025-ci ildə bu bazarın həcmi 214,1 milyon dollar təşkil edib. İllik orta artım tempinin 13,4% olacağı gözlənilir. Bazarın əsas inkişaf amilləri arasında əməliyyatların sayının artması, yaşlı əhalinin çoxalması, səhiyyə infrastrukturunun genişlənməsi və teletibbin yayılması göstərilir.

Virtual preabilitasiya xəstələri əməliyyata hazırlamaq üçün məsafədən göstərilən xidmətləri əhatə edir. Bu proqramlara fiziki hazırlıq, qidalanmanın optimallaşdırılması, psixoloji dəstək və digər fərdi yanaşmalar daxildir.

Mütəxəssislər bildirirlər ki, süni intellekt əsaslı fərdiləşdirilmiş proqramlar xəstənin yaşı, sağlamlıq vəziyyəti və risklərinə uyğun hazırlıq planlarının hazırlanmasına imkan verir.

Bazarın inkişafını məhdudlaşdıran əsas amillər arasında maliyyələşdirmə problemləri, rəqəmsal bərabərsizlik və bu xidmətlərin xəstəxana sistemlərinə inteqrasiyasının çətinliyi qeyd olunur.