Osteoporoz diaqnozu qoyulan bir çox insan kalsium əlavələrinin müalicənin əsas hissəsi olduğunu düşünür. Lakin yeni araşdırma göstərir ki, hər kəsin əlavə kalsium qəbul etməsinə ehtiyac olmaya bilər.

Aztibb.az xəbər verir ki, “Osteoporosis International” jurnalında dərc olunan tədqiqatda gündəlik qidalanma ilə kifayət qədər kalsium qəbul edən və osteoporoz dərmanları istifadə edən yaşlı qadınlar araşdırılıb.

Nəticələrə görə, əlavə kalsium preparatları bud sümüyünün mineral sıxlığını (BMD) və sümük möhkəmliyini artırmayıb. Əksinə, qida ilə əlavə zülal qəbul edən qadınlarda sümük əriməsi müalicəsinin effektivliyi daha yüksək olub.

Kalsium əlavəsi təyin edilməzdən əvvəl pasiyentin qida ilə nə qədər kalsium qəbul etdiyi qiymətləndirilməlidir. Araşdırmanın bəzi məhdudiyyətləri olsa da, nəticələr göstərir ki, osteoporozun uğurlu müalicəsində dərmanlarla yanaşı, kifayət qədər zülal qəbulunu təmin edən balanslı qidalanma da mühüm rol oynayır.

Qeyd olunan araşdırma müəyyən xəstə qrupu üzərində aparılmışdır və bütün pasientlərə şamil olunmaya bilər. Unutmamaq lazımdır ki, osteoporoz metabolik bir xəstəlikdir. Əmələ gəlməsində və sağalmasında da bir çox qidalanma və həyat faktorları da rol oynayır.