ABŞ alimlərinin apardıqları araşdırma göstərib ki, qarın piylənməsi olan böyüklərdə 26 həftə ərzində hər gün bir avokado qəbul edilməsi aterogen aşağı sıxlıqlı lipoproteinlərin (LDL) ümumi konsentrasiyasını azalda bilər.

Aztibb.az xəbər verir ki, "The American Journal of Clinical Nutrition" jurnalında dərc olunan tədqiqata 786 nəfər cəlb edilib. Onlardan 389-u 26 həftə ərzində gündə bir avokado qəbul edib, 397 nəfər isə adi qidalanma rejimini davam etdirib.

Nəticələrə görə, avokado qəbul edən iştirakçılarda LDL lipoproteinlərinin ümumi səviyyəsi nəzarət qrupu ilə müqayisədə daha aşağı olub. Bununla yanaşı, yüksək sıxlıqlı lipoproteinlər (HDL), triqliseridlərlə zəngin lipoproteinlər, insulinrezistentlik və iltihab göstəricilərində əhəmiyyətli dəyişiklik müşahidə edilməyib.

Müəlliflərin fikrincə, gündə bir avokado qəbul edilməsi qarın piylənməsi olan şəxslərdə lipid profilinin müəyyən göstəricilərinin yaxşılaşmasına kömək edə bilər. Bununla belə, digər lipid göstəricilərinə və metabolik markerlərə əhəmiyyətli təsir qeydə alınmayıb.