Yay aylarında havanın həddindən artıq isti olması sürücülərin diqqətini zəiflədərək yol-nəqliyyat hadisələrinin riskini artıra bilər. Mütəxəssislər isti havada uzun səfərə çıxan sürücülərə mütəmadi su içməyi və tez-tez fasilə verməyi tövsiyə edirlər.

Aztibb.az "TRT Haber"ə istinadən yazır ki, mütəxəssislərin sözlərinə görə, yüksək temperatur orqanizmdə tərləmə və maye itkisini artırır. Bu isə ürək döyüntüsünün sürətlənməsinə, diqqətin azalmasına və reflekslərin zəifləməsinə səbəb ola bilər.

Araşdırmalar göstərib ki, temperatur yüksəldikcə təhlükəsiz avtomobil idarəetmə müddəti də azalır. Təxminən 30°C temperaturda sürücünün təhlükəsiz idarəetmə müddəti orta hesabla 80 dəqiqə olduğu halda, hava 40°C-yə yaxınlaşdıqda bu müddət 53 dəqiqəyə qədər enə bilər.

Mütəxəssislər xüsusilə günün ən isti saatları olan 14:00–17:00 aralığında yola çıxarkən daha diqqətli olmağı məsləhət görürlər. Bu saatlarda yuxululuq və diqqət dağınıqlığı daha çox müşahidə olunur.

Təhlükəsiz səfər üçün sürücülərə aşağıdakı tövsiyələr verilir:

avtomobildə kondisionerdən istifadə etmək;
müntəzəm olaraq su içmək;
hər 2 saatdan bir 20–30 dəqiqə istirahət etmək;
yola çıxmazdan əvvəl kifayət qədər yatmaq.

Mütəxəssislər bildirirlər ki, sərnişinlər də sürücünün yorğun və ya diqqətsiz olduğunu hiss etdikdə onu mütləq fasilə verməyə təşviq etməlidirlər. Bu, qəza riskinin azalmasına kömək edə bilər.