Kolonoskopiya haqqında ən çox rast gəlinən yanlış düşüncələrdən biri onun çox ağrılı və təhlükəli prosedur olmasıdır. Əslində isə müasir endoskopiya texnologiyaları və sedasiya (rahatlaşdırıcı dərmanlar) sayəsində pasiyentlər müayinəni rahat keçirirlər.

 

Bu barədə Aztibb.az-a məlumat verən HTC Cliniva Hospitalın ümumi cərrahı, proktoloq və endoskopisti Anar Əliyev bildirib ki, kolonoskopiya yoğun bağırsağın daxili səthini ətraflı qiymətləndirməyə imkan verən ən etibarlı müayinə üsullarından biridir. Bu müayinə sayəsində poliplər erkən aşkar edilə və hətta eyni prosedur zamanı çıxarıla bilər. Erkən diaqnostika isə yoğun bağırsaq xərçənginin qarşısının alınmasında mühüm rol oynayır.

 

Həkim qeyd edib ki, aşağıdakı hallarda kolonoskopiya tövsiyə oluna bilər:

Nəcisdə qan müşahidə olunarsa

Uzunmüddətli qəbizlik və ya ishal olduqda

Səbəbi bilinməyən qarın ağrıları zamanı

Ailədə yoğun bağırsaq xərçəngi tarixçəsi varsa

45 yaşdan yuxarı profilaktik müayinə məqsədilə

 

"Unutmayın, kolonoskopiyadan qorxmaq əvəzinə, onu sağlamlığınızı qorumaq üçün vacib bir addım kimi qəbul etmək daha doğru yanaşmadır", - deyə o, əlavə edib.