Dövlət İmtahan Mərkəzinin (DİM) təşkil etdiyi ali təhsil müəssisələrinin sərgisi abituriyentlərə ixtisas və universitet seçimini daha məlumatlı şəkildə həyata keçirmək, ali məktəblərin təhsil imkanları, akademik mühiti və inkişaf perspektivləri ilə yaxından tanış olmaq üçün mühüm imkan yaradır. 

Sərgi çərçivəsində Azərbaycan Tibb Universiteti (ATU) tərəfindən abituriyentlər və onların valideynləri üçün məlumatlandırıcı görüş keçirilib.

Universitetdən Aztibb.az-a bildirilib ki, görüşün əsas məqsədi iştirakçılara universitetdə tədris prosesi, fakültələr üzrə imkanlar, tələbə həyatı, elmi fəaliyyət və gələcək peşə perspektivləri barədə ətraflı məlumat vermək olub. 

Tədbirdə ATU-nun II Müalicə-profilaktika fakültəsinin dekanı İsrail Məhərrəmbəyli, Stomatologiya fakültəsinin dekanı Elmira Əliyeva, İctimai səhiyyə fakültəsinin dekanı Qalina Qəniyeva, eləcə də Tələbə Elmi Cəmiyyətinin rəhbəri Nərgiz Məmmədova çıxış ediblər. 

Çıxışlar zamanı universitetdə tətbiq olunan müasir təhsil proqramları, klinik baza və praktiki hazırlıq imkanları, tələbələrin elmi-tədqiqat fəaliyyətinə cəlb olunması, beynəlxalq əməkdaşlıq layihələri, mübadilə proqramları və məzunların peşə inkişaf perspektivləri barədə məlumat verilib.

Görüş interaktiv müzakirələrlə davam edib. Abituriyentlər və valideynlər qəbul qaydaları, təhsil prosesi, fakültələrin xüsusiyyətləri, tələbə həyatı və gələcək karyera imkanları ilə bağlı suallarını ATU nümayəndələrinə ünvanlayıblar. Səsləndirilən suallar ətraflı şəkildə cavablandırılıb. 

Bu cür görüşlər abituriyentlərə düzgün ixtisas seçimi etməyə, ali təhsil mühiti ilə yaxından tanış olmağa və gələcək peşə yollarını daha aydın müəyyənləşdirməyə kömək edir.