Uşağa “ağlama” demək çox vaxt onu qorumaq və sakitləşdirmək niyyəti ilə edilir. Lakin mütəxəssislər bildirirlər ki, daim göz yaşlarını saxlamaq vərdişi insanın gələcəkdə emosional gərginlik və stresslə mübarizə qabiliyyətinə mənfi təsir göstərə bilər.

Aztibb.az "Poisknews"a istinadən yazırt ki, klinik psixoloq Marianna Abravitovanın sözlərinə görə, ağlamaq sinir sisteminin həddindən artıq yüklənməsinə qarşı təbii müdafiə mexanizmidir. Göz yaşları güclü emosional hadisədən sonra yaranan gərginliyi azaltmağa və insanın özünü daha yaxşı hiss etməsinə kömək edir.

Mütəxəssis qeyd edir ki, emosiyalarını ifadə etməkdən daim çəkinən insanlar ağlamağa səbəb olan çətin vəziyyətlərə daha çətin uyğunlaşırlar. Bu davranışın səbəbi çox vaxt insanın böyüdüyü mühitlə bağlı olur. Bəzi ailələrdə ağlamaq zəiflik və ya qəbuledilməz davranış kimi qəbul edildiyi üçün uşaq hisslərini gizlətməyə alışır.

Psixoloqun fikrincə, orqanizm bəzən emosional boşalma ehtiyacını özü göstərir. Bu, ağlama zamanı nəfəsalma dəyişiklikləri, sinədə sıxılma və digər fiziki reaksiyalarla müşayiət oluna bilər.

Mütəxəssislər vurğulayırlar ki, ağlamaq zəiflik əlaməti deyil, əksinə, insanın emosional tarazlığını qorumağa kömək edən təbii fizioloji prosesdir.