Həyatın ilk 3 ayı körpələrin sağlam inkişafı baxımından ən vacib dövrlərdən biridir. Bu mərhələdə aparılan müntəzəm tibbi müayinələr və vaxtında vurulan peyvəndlər körpələrin sağlam böyüməsində mühüm rol oynayır.

 

Aztibb.az xəbər verir ki, Quba Rayon Mərkəzi Xəstəxanasında neonatoloq və pediatr həkimlər tərəfindən 0–3 aylıq körpələrin planlı profilaktik müayinələri həyata keçirilir.

 

Müayinələr zamanı körpələrin çəki və boy artımı, baş çevrəsi, ümumi fiziki inkişafı, tənəffüs sistemi və sağlamlıq göstəriciləri qiymətləndirilir. Eyni zamanda valideynlərə ana südü ilə qidalanma, düzgün körpə baxımı və sağlam inkişafın izlənilməsi ilə bağlı ətraflı tövsiyələr təqdim olunur.

 

Milli Peyvənd Təqviminə uyğun olaraq körpələrə vərəm, hepatit B və digər infeksion xəstəliklərə qarşı peyvəndlər vaxtında tətbiq edilir. Peyvəndlər uşaqların immunitetinin formalaşmasına, təhlükəli xəstəliklərdən qorunmasına və sağlam gələcəyinin təmin olunmasına xidmət edir.