Ümumdünya İnsan Alverinə Qarşı Mübarizə Gününə həsr olunmuş Balakən Gömrük İdarəsində maarifləndirici tədbir keçirilib.

Tədbirdə Dövlət Gömrük Komitəsinin Tibbi Xidmət İdarəsinin və Əməliyyat-İstintaq Baş İdarəsinin, Daxili İşlər Nazirliyinin İnsan Alverinə Qarşı Mübarizə Baş İdarəsinin, Əmək və Əhalinin Sosial Müdafiəsi Nazirliyinin tabeliyində Sosial Xidmətlər Agentliyinin nümayəndələri, eləcə də Balakən Gömrük İdarəsinin əməkdaşları iştirak ediblər.

Bu barədə Aztibb.az-a Mərkəzi Gömrük Hospitalından xəbər verilib.

Tədbir çərçivəsində DGK Tibbi Xidmət İdarəsinin rəis müavini, tibb üzrə fəlsəfə doktoru, dosent İsmayıl Əfəndiyev “İnsan alveri ilə mübarizədə gömrük əməkdaşlarının rolu” mövzusunda təlim keçirib.

Hüquq, tibb və psixologiyanın kəsişməsində hazırlanmış təlim zamanı insan alverinin əsas formaları və yaratdığı təhlükələr, potensial qurbanların müəyyən edilməsi, onlarla düzgün ünsiyyətin qurulması, risk əlamətlərinin vaxtında aşkar edilməsi, həmçinin belə hallarla qarşılaşan gömrük əməkdaşlarının fəaliyyət alqoritmi barədə praktiki məlumatlar təqdim olunub.

Tədbirin sonunda mövzu ətrafında fikir mübadiləsi aparılıb, real iş şəraitində rast gəlinən vəziyyətlər müzakirə edilib və iştirakçıları maraqlandıran suallar cavablandırılıb.