Mədə-bağırsaq traktından qanaxmalar müasir tibbdə əksər hallarda cərrahi əməliyyata ehtiyac olmadan, endoskopik yolla uğurla aradan qaldırılır.

 

ATU-nun Tədris Cərrahiyyə Klinikasının ümumi cərrahı, həkim qastroenteroloq Fərahim Məmmədzadə Aztibb.az-a bildirib ki, bu üsul xəstələr üçün daha az travmatik olmaqla yanaşı, sağalma müddətini də xeyli qısaldır.

 

Onun sözlərinə görə, mədə-bağırsaq qanaxmaları endoskopik müayinə zamanı aşkarlanır və qanaxma mənbəyinə birbaşa müdaxilə edilərək dayandırılır. Bunun üçün adrenalin inyeksiyası, hemoklip qoyulması və ya termal koaqulyasiya kimi üsullardan istifadə olunur. Prosedur ümumilikdə təhlükəsiz sayılsa da, nadir hallarda təkrar qanaxma və ya bağırsaq divarının zədələnməsi kimi ağırlaşmalar müşahidə oluna bilər.

 

Fərahim Məmmədzadə vurğulayıb ki, düzgün seçilmiş texnika və vaxtında müdaxilə bu cür halların qarşısını əhəmiyyətli dərəcədə azaldır. Onun sözlərinə görə, prosedurun uğurunu şərtləndirən əsas faktorlar arasında dəqiq diaqnostika, komandanın koordinasiyası və endoskopik avadanlığın texniki imkanları xüsusi yer tutur.

 

Tədris Cərrahiyyə Klinikasında bu sahədə yeni nəsil endoskopik cihazlar tətbiq olunur ki, bu da diaqnostikanın dəqiqliyini və müdaxilənin təhlükəsizliyini artırır. Texnologiyanın davamlı inkişafı sayəsində qanaxmaların idarə olunmasında da daha effektiv üsullar mümkün olur.