ABŞ-dan olan Luna Fenner, üzünü demək olar ki, tam örtən nəhəng anadangəlmə xalın müalicəsini uğurla başa vurduqdan sonra xüsusi fotosessiyada iştirak edib. O, çəhrayı şahzadə libasında obyektiv qarşısına keçərək xoşbəxt və özünəinamlı görüntüsü ilə diqqət çəkib. Bu barədə onun müalicəsini aparan həkim Olqa Filippova məlumat verib.

Aztibb.az "Life" portalına istinadən yazır ki, iyulun 22-də Lunaya nevusun və əməliyyatdan qalan çapıqların son qalıqlarının aradan qaldırılması üçün yekun cərrahi müdaxilə həyata keçirilib. Ertəsi gün tikişlər və sarğılar çıxarılıb. Həkimlərin sözlərinə görə, qız artıq "Betmen maskası"ndan tamamilə xilas olub. Sarğılar çıxarıldıqdan sonra Luna sevincindən rəqs edib.

Luna Fenner üzünün böyük hissəsini əhatə edən nəhəng melanositar nevusla dünyaya gəlib. Görünüşünə görə bu xal "Betmen maskası" adlandırılırdı. ABŞ-da ailəyə uzunmüddətli və mürəkkəb müalicə planı təklif olunsa da, valideynlər rusiyalı mütəxəssislərə müraciət etməyi seçiblər. İlk əməliyyatlar Krasnodarda, sonrakı mərhələlər isə Sankt-Peterburqda həyata keçirilib.

Müalicənin son mərhələsindən əvvəl qızın çiyin nahiyəsində şübhəli törəmə aşkar edilib. Həmin törəmə çıxarılaraq histoloji müayinəyə göndərilib. Bu yaxınlarda isə Lunanın əməliyyatdan sonrakı tikişləri də tamamilə götürülüb.