Böyük Britaniyada 14 yaşlı qızın ürəyində olan dəliyi bağlamaq üçün ilk dəfə tamamilə sorulan implant tətbiq edilib. Bioloji parçalana bilən bu implantın zamanla orqanizm tərəfindən sorulması və ürək toxumasının özünü bərpa etməsinə şərait yaratması gözlənilir.

Aztibb.az BBC-yə istinadən yazır ki, Uorrinqton şəhərindən olan Lillie Yale ürəyindəki qüsurun müalicəsi üçün daimi metal cihazın yerləşdirilməsi riski ilə üzləşib. Belə bir cihaz onun peşəkar reqbi oyunçusu olmaq arzusuna mane ola bilərdi.

Lakin yeni texnologiya sayəsində Lillie üçün bioloji parçalana bilən implantdan istifadə edilib. İmplant qarşıdakı aylar və illər ərzində ürək toxumasının sağalması üçün müvəqqəti “dayaq” rolunu oynayacaq. Daha sonra isə tədricən tamamilə parçalanaraq orqanizmdə heç bir iz buraxmayacaq.

Prosedur iyun ayında Liverpul şəhərində yerləşən Alder Hey Uşaq Xəstəxanası NHS Fondunun cərrahları tərəfindən 14 yaşlı Lillie üzərində həyata keçirilib.

Bu, Memosorb adlı cihazın qulaqcıqlararası çəpər qüsuru (ASD) olan pasiyentdə ilk dəfə tətbiqidir. ASD ürəyin iki yuxarı kamerasını – qulaqcıqları – bir-birindən ayıran divarda dəliyin olması ilə xarakterizə olunan anadangəlmə ürək qüsurudur.

Memosorb implantı tibbdə sorulan tikiş materiallarının hazırlanmasında geniş istifadə olunan materialdan istehsal edilib.

Lillienin 38 yaşlı anası Becci Nichols qızının “mükəmməl şəkildə sağaldığını” bildirib.

Onun sözlərinə görə, əməliyyatdan sonra Lillie artıq 5 kilometrlik qaçışda iştirak edib, əyləncə parkına gedib və yenidən reqbi oynamağa başlayıb.

İmplant ürəyin özünü bərpa etməsinə şərait yaradır

Müalicəni həyata keçirən pediatrik kardioloq, doktor Salim Jivanji bildirib ki, yeni cihaz görünüş baxımından hazırda bazarda olan ənənəvi cihazlara “çox bənzəyir”.

Onun sözlərinə görə, ənənəvi metal cihaz tətbiq edildikdə zamanla onun üzərində toxuma təbəqəsi formalaşmağa başlayır. Yeni implant isə fərqli mexanizmə malikdir və ürəyin sağalma prosesini dəstəkləyən müvəqqəti “dayaq” funksiyasını yerinə yetirir.

Mütəxəssis qeyd edib ki, implant zamanla parçalandıqca ürək toxumasının özünü bərpa etməsi üçün şərait yaranır və nəticədə orqanizmdə daimi metal cihaz qalmır.