2050-ci ilədək dünyada 300 milyon insan aclıqla mübarizə aparmaq məcburiyyətində qalacaq.

Aztibb.az xəbər verir ki, bu barədə BMT-nin Qida və Kənd Təsərrüfatı Təşkilatı (FAO) tərəfindən aparılan araşdırmada bildirilib. Təşkilat dünyada artan əhali və qida israfının gələcək nəsillər üçün böyük bir təhlükə yaratdığını açıqlayıb.

Həddindən artıq qidalanma ehtiyacımızdan daha çox protein istehlakına səbəb olur. Sağlam, yetkin bir insan normalda 56 qram protein istehlak etməlidirsə, 2009-cu ildən etibarən bu limit aşılaraq 68 qrama çatıb. Dünya Resursları İnstitutunun 2016-cı il hesabatında vurğulanır ki, istehlakçıların qidalanma normalarına dəyişikliklər etməsi ekoloji problemlərin azalması, kənd təsərrüfatı qaynaqlarından səmərəli istifadə və s. kimi müsbət nəticələr doğura bilər.

Mütəxəssislər günlük qidalanmanı normada saxlamağı, heyvan əsaslı proteinlər (yumurta, ət, süd) əvəzinə bitki mənşəli protein mənbələrini seçməyi tövsiyə edir: “Gündə ən az 5 porsiya meyvə və tərəvəz istehlak edin. Qida rasionunuza fındıq, qoz və ya badam kimi quru meyvələr, dənli və paxlalı bitkiləri salın. Sağlam bir həyat üçün ideal çəkiyə enin. Sadalanan yemək vərdişlərinin davamlı olmasına diqqət edin."