ABŞ-ın Qida və Dərman Administrasiyası (FDA) böyüklərdə narkolepsiya tip 1-in müalicəsi üçün "Orzeyful" (oveporekston) preparatını təsdiqləyib. Bu, xəstəliyin ayrı-ayrı simptomlarını deyil, əsas bioloji səbəbini hədəfləyən ilk preparat hesab olunur.

Aztibb.az xəbər verir ki, narkolepsiya tip 1 beyində orekstin (oreksin) ifraz edən hüceyrələrin itirilməsi ilə əlaqədar yaranan nadir xroniki yuxu pozğunluğudur. Yeni preparat orqanizmdə çatışmayan oreksin siqnalını bərpa etməklə gündüz yuxululuğu, katapleksiya, yuxu iflici və digər simptomların azalmasına kömək edir.

Preparatın effektivliyi və təhlükəsizliyi 273 yetkin pasiyentin iştirakı ilə aparılan iki klinik tədqiqatda qiymətləndirilib. Nəticələr göstərib ki, "Orzeyful" qəbul edən xəstələrdə gündüz ayıqlığı artır, yuxululuq və katapleksiya epizodları azalır.

Preparat gündə iki dəfə ağızdan qəbul edilir. Ən çox müşahidə olunan əlavə təsirlər yuxusuzluq, tez-tez sidiyə getmə və tüpürcək ifrazının artmasıdır.

"Orzeyful"un ABŞ bazarına çıxarılması üçün hazırda ABŞ Narkotiklərlə Mübarizə Administrasiyasının (DEA) yekun qərarı gözlənilir.