Divertikulyoz və divertikulit tez-tez bir-biri ilə qarışdırılan həzm sistemi xəstəlikləridir.
Aztibb.az xəbər verir ki, mütəxəssislər bu iki anlayışın mənası və müalicə yanaşmasının fərqli olduğunu bildirirlər.
Belə ki, divertikulyoz yoğun bağırsağın divarında kiçik kisəciklərin – divertikulların əmələ gəlməsi ilə xarakterizə olunur. Bu vəziyyət əksər hallarda heç bir əlamət vermir və profilaktik müayinələr zamanı təsadüfən aşkar edilir.
Divertikulit isə həmin divertikulların iltihablaşması nəticəsində yaranır və tibbi müdaxilə tələb edən vəziyyət hesab olunur.
Həkimlərin sözlərinə görə, divertikulit zamanı sol aşağı qarın nahiyəsində ağrı, qızdırma, qəbizlik və ya ishal, həmçinin ümumi halsızlıq kimi əlamətlər müşahidə oluna bilər.
Xəstəliyin diaqnozu həkim müayinəsi, laborator analizlər və zərurət olduqda qarın boşluğunun kontrastlı kompüter tomoqrafiyası (KT) əsasında dəqiqləşdirilir. Müalicə xəstəliyin ağırlıq dərəcəsinə uyğun müəyyən edilir. Yüngül hallarda dərman müalicəsi kifayət etsə də, ağırlaşmalar zamanı cərrahi müdaxilə tələb oluna bilər.
Mütəxəssislər vurğulayırlar ki, ilk simptomlar yarandıqda vaxtında həkimə müraciət edilməsi mümkün ağırlaşmaların qarşısının alınmasında mühüm əhəmiyyət daşıyır.