Almaniyanın Essen Universitet Xəstəxanasının alimləri müəyyən ediblər ki, ağır COVID-19 keçirən və birinci tip sadə herpes virusunun (HSV-1) yenidən aktivləşməsi müşahidə olunan xəstələrdə reanimasiya şöbəsində sağqalım daha aşağı, intensiv orqan dəstəyinə ehtiyac isə daha yüksək olur.
Aztibb.az xəbər verir ki, "PLoS One" jurnalında dərc olunan tədqiqata əsasən, reanimasiya şöbəsində müalicə alan xəstələrin 36%-də virus reaktivasiyası qeydə alınıb. HSV-1-in yenidən aktivləşməsi süni tənəffüs ventilyasiyasına daha uzun müddət ehtiyac, ekstrakorporal membran oksigenasiyası (ECMO) və böyrək əvəzedici terapiyanın daha tez-tez tətbiqi ilə əlaqələndirilib.
Araşdırma 455 təsdiqlənmiş COVID-19 xəstəsinin məlumatlarını əhatə edib. Müəlliflər hesab edirlər ki, ağır COVID-19 xəstələrində virus yükünün müntəzəm monitorinqi aparılmalı, antiviral müalicənin effektivliyini qiymətləndirmək üçün əlavə tədqiqatlar həyata keçirilməlidir.