Tədqiqatlar göstərir ki, sağlam hamiləlik üçün təkcə ananın deyil, atanın qidalanması da böyük əhəmiyyət daşıyır. Mütəxəssislərin fikrincə, atanın mayalanmadan əvvəlki qidalanma vərdişləri körpənin doğulduğu andakı çəkisinə və bədən yağının miqdarına təsir göstərə bilər.

Aztibb.az xəbər verir ki, 43 ailənin iştirak etdiyi araşdırmada mayalanmadan əvvəl daha çox ultra-emal olunmuş qida qəbul edən ataların övladlarının artıq çəki və bel, eləcə də bud nahiyəsində daha çox piy toxuması ilə dünyaya gəldiyi müəyyən edilib. Mütəxəssislər bildirirlər ki, yüksək doğum çəkisi və erkən yaşlarda artıq piylənmə gələcəkdə ürək-damar və maddələr mübadiləsi xəstəlikləri riskini artıra bilər.

Araşdırmaya görə, ultra-emal olunmuş qidalar orqanizmdə iltihabi prosesləri gücləndirə, spermanın keyfiyyətinə mənfi təsir göstərə və uşağa ötürülən bəzi genlərin fəaliyyətini dəyişə bilər. Xüsusilə yalnız atadan miras qalan və dölün inkişafında mühüm rol oynayan **IGF-II** geninin bu prosesdən təsirlənə biləcəyi qeyd olunur.

Tədqiqat həmçinin göstərib ki, ananın qidalanması da körpənin inkişafına təsir edir. Hamiləliyin erkən dövründə daha çox ultra-emal olunmuş qida qəbul edən anaların körpələri adətən daha aşağı çəki, daha qısa boy və daha kiçik baş çevrəsi ilə doğulurlar.

Mütəxəssislər hesab edirlər ki, ailə planlaşdırılması və sağlam hamiləliklə bağlı tövsiyələr hazırlanarkən təkcə anaların deyil, gələcək ataların da qidalanmasına xüsusi diqqət yetirilməlidir.

Araşdırmanın nəticələri "Nutrition Research" jurnalının iyul sayında dərc olunub.