Qida sektorunda ən qarışıq məsələlərdən biri də insan sağlamlığında mühüm rol oynayan yağ seçimidir. 

Aztibb.az dietoloq Amaliya Rəhimovanın zeytun yağları ilə bağlı paylaşdığı mühüm məlumatları təqdim edir.

Zeytun yağı bir neçə kateqoriyada istehsal olunur:

1. "EXTRA VIRGİN Olive Oil" ən keyfiyyətli yağdır. Əl ilə yığılmış zeytunlar mexaniki üsul ilə, məhsul dərildikdən sonrakı 10 saat ərzində 27 dərəcədən yuxarı olmayan istilikdə sıxılır. İstiliyə dözümsüzdür, yanma temperaturu 180 dərəcədir. 

2. "VİRGİN Olive Oil" eyni üsul ilə, lakin daha aşağı keyfiyyətli, maşınla yığılmış, nisbətən zədələnmiş zeytunlardan əldə olunur. Faydalı, lakin dad və ətir baxımından "Extra" növdən bir pillə aşağıdır. 

3. "REFİNED Olive Oil" (rafinə yağ) ilk sıxılmış yağ olsa da, keyfiyyəti yüksək olmadığından kimyəvi texnologiyalar ilə rafinə edilib təmizlənir. Dad və qoxusu yoxdur, faydalı maddələri azdır. 

4. "POMACE Olive Oil" ikinci əl sıxımdır. Yağın çıxarılması üçün kimyəvi maddə əlavə olunub qızdırılır, sonra maddə və qalıq suyu buxarlanıb çıxarılır, ayrılmış yağ rafinə edilib təmizlənir. Dad və qoxu vermək üçün az miqdarda ilk sıxım yağı qatılır. Yanma dərəcəsi təqribən 260 dərəcə olduğundan əsasən qızartmalarda istifadə olunur. Faydası yoxdur.

Yağın keyfiyyətinin rənginə görə təyin edilməsi yanlışdır. Çünki becərilmə regionu, yığılma vaxtı və yetişmə dərəcəsindən asılı olaraq rəng fərqli olur.

Yağ alarkən istehsal tarixinə diqqət etmək vacibdir. Saxlanma müddəti 18-24 ay arasıdır. Lakin yağ nə qədər yeni olsa, o qədər faydalı olur. Açdıqdan sonra 3, uzağı 4 həftə ərzində istifadə edilməsi məsləhətdir. Ağzı kip bağlanmalı, qaranlıq və sərin yerdə saxlanmalıdır.

Çox böyük qablaşma (3-5 litr) kiçik qaba töküb istifadə edilməlidir ki, hər dəfə böyük qabdakı çoxlu yağ oksigenlə təmasda olub oksidləşməsin.