Azərbaycan Respublikasının Milli Peyvənd Təqviminə uyğun olaraq Şamaxı Rayon Mərkəzi Xəstəxanasının həkim-pediatrı mobil klinika vasitəsilə Laləzar və Quşçu kəndlərində uşaqların peyvəndlənməsini həyata keçirib.

Şamaxı RMX-dan Aztibb.az-a bildirilib ki, səyyar xidmət zamanı uşaqlar müayinə olunub və yaşlarına uyğun olaraq Heksa, PK (pnevmokok) və QPM peyvəndləri tətbiq edilib.

Heksa peyvəndi difteriya, göyöskürək, tetanus, inaktivləşdirilmiş poliomielit, Hepatit B və HİB infeksiyası kimi altı təhlükəli xəstəliyə qarşı qoruyucu immunitet formalaşdırır.
PK (pnevmokok) peyvəndi pnevmoniya, meningit, sepsis və orta qulaq iltihabı kimi pnevmokok bakteriyasının törətdiyi ağır xəstəliklərin qarşısının alınmasında mühüm rol oynayır.

QPM peyvəndi isə qızılca, parotit (epidemik qulaqdibi) və məxmərək kimi yüksək yoluxuculuğa malik virus infeksələrinə qarşı etibarlı qorunma təmin edir.

Həkim pediatr tərəfindən valideynlərə peyvəndlərin təhlükəsizliyi, effektivliyi və uşaqların sağlam böyümə və inkişafındakı əhəmiyyəti barədə ətraflı məlumat verilib. Bildirilib ki, Milli Peyvənd Təqviminə uyğun olaraq peyvəndlərin vaxtında aparılması uşaqları peyvəndlə qarşısı alına bilən yoluxucu xəstəliklərdən qorumağın ən etibarlı üsuludur.