Rusiya Federasiyası Təhlükəsizlik Şurası sədrinin müavini Dmitri Medvedev jurnalistlərə iki ay əvvəl koronavirusa qarşı Rusiya istehsalı vaksinlə peyvənd olunduğunu açıqlayıb.
Medvedev “İnterfaks” və bir sıra Rusiya KİV orqanlarına verdiyi müsahibədə konkret olaraq hansı peyvəndi vurdurduğunu açıqlamayıb.
“İki ay əvvəl rus peyvəndlərindən biri ilə peyvəndləndim. Niyə belə deyirəm? Bəzi peyvəndlərin digərindən daha yaxşı olduğu təəssüratı yaranmasın deyə”, - deyə Medvedev qeyd edib.
“Burada sual nədir? Peyvənd hər zaman fərdi bir məsələdir: qan verməlisiniz, vücudunuzun hansı vəziyyətdə və hansı immunitet vəziyyətində olduğunu anlamalısınız. Bu, yaşdan və təəssüf ki, cinsdən asılıdır - bildiyiniz kimi, kişilər bu xəstəliyi daha ağır keçirirlər”, - deyə Təhlükəsizlik Şurası sədrinin müavini bildirib.
Medvedev özünün vaksinasiya prosesindən heç bir yan təsir və fəsad olmadan keçdiyini də sözlərinə əlavə edib.
