Konqo Demokratik Respublikasında (KDR) davam edən Ebola epidemiyasında təsdiqlənmiş yoluxma sayı 4 mini keçib. Afrika Xəstəliklərə Nəzarət və Profilaktika Mərkəzi (Africa CDC) virusun mutasiyaya uğramış ola biləcəyindən narahat olduğunu bildirərək epidemiya ilə mübarizəni ən yüksək səviyyəyə qaldıracağını açıqlayıb.

Aztibb.az "TRT Haber"ə istinadən yazır ki, Ebola virusunun Bundibuqyo ştamının səbəb olduğu epidemiyanın əslində yanvar ayından yayıldığı ehtimal edilir. Avqustun 4-nə olan məlumata görə, ölkədə 3 973 yoluxma və 1 801 ölüm qeydə alınıb. Africa CDC-nin baş direktoru Jan Kaseya sonradan təsdiqlənmiş yoluxma sayının 4 mini keçdiyini bildirib.

Bu epidemiya artıq tarixdə qeydə alınan ikinci ən böyük Ebola epidemiyası hesab olunur. Mütəxəssislər Ümumdünya Səhiyyə Təşkilatı ilə birlikdə virusun genetik dəyişikliklərə məruz qalıb-qalmadığını müəyyənləşdirmək üçün əlavə tədqiqatlara başlayırlar.

Yoluxmaların izlənməsi çətinləşib

Mütəxəssislərin sözlərinə görə, Ebola xəstələrinin böyük hissəsi səhiyyə müəssisələrinə müraciət etmədən vəfat edir ki, bu da gizli yoluxma zəncirinin geniş olduğunu göstərir. Hazırda hər bir xəstə üzrə izlənilməsi gözlənilən təxminən 40 təmaslı şəxsdən cəmi 10 nəfəri müəyyən etmək mümkün olur.

Epidemiya əsasən İturi əyalətində yayılsa da, artıq Şimali Kivu, Cənubi Kivu, Haut-Uele və Tshopo əyalətlərinə də yayılıb. Qonşu Uqandada isə epidemiya nəzarət altına alınana qədər 20 yoluxma qeydə alınıb.

Mübarizə tədbirləri genişləndirilir

Africa CDC aktiv yoluxma axtarışına başlayacağını açıqlayıb. Bu çərçivədə səhiyyə işçiləri ev-ev gəzərək Ebola əlamətləri olan şəxsləri müəyyən etməyə çalışacaqlar. Yerli icmaların və məcburi köçkün düşərgələrinin də cəlb olunduğu yeni müdaxilə planı hazırlanır.

Bundan əlavə, xəstələrin müalicəsində humanitar məqsədlə remdesivir antiviral preparatından istifadə ediləcək. Digər Ebola ştamına qarşı təsdiqlənmiş Ervebo peyvəndinin Bundibuqyo ştamına qarşı da ağırlaşma və ölüm riskini azaltdığına dair ilkin nəticələr əldə edildiyindən onun tətbiqi də qiymətləndiriləcək.

UNICEF isə epidemiya səbəbindən insanların tibb müəssisələrinə müraciət etməkdən çəkinməsinin digər sağlamlıq xidmətlərinə də mənfi təsir göstərdiyini bildirib. Epidemiyanın mərkəzi hesab olunan Monqbvalu bölgəsində uşaqlar arasında qızılca peyvəndinin ilk dozası ilə əhatə səviyyəsinin 69 faiz azaldığı qeyd olunub.