Nevroloq: COVID-19-dan sonra Alzheimer xəstəliyinin yeni hallarının artım tempi sürətlənib

COVID-19 pandemiyasından sonra dünyada Alzheimer xəstəliyi və digər demensiya formaları ilə bağlı vəziyyətin daha da mürəkkəbləşdiyi bildirilir.

Aztibb.az "Life" portalına istinadən yazır ki, nevroloq, professor Rena İsmayılovanın sözlərinə görə, 2020-ci ildən sonra Alzheimer xəstəliyi diaqnozu qoyulan insanların sayında artım müşahidə edilir.

Mütəxəssis hesab edir ki, bu artımın səbəblərindən biri daha əvvəl koronavirus infeksiyasının keçirilməsi ola bilər. Onun sözlərinə görə, xüsusilə ağır COVID-19 hallarında orqanizmdə baş verən güclü iltihabi reaksiya sinir sisteminə təsir göstərə bilər.

“Yaşlı insanlar arasında Alzheimer xəstəliyinin daha çox müşahidə olunmasına bir sıra amillər səbəb ola bilər. Lakin əsas amillərdən biri beş-altı il əvvəl yaşadığımız koronavirus dalğası hesab edilə bilər. COVID-19 infeksiyası əksər hallarda ‘sitokin fırtınası’ ilə müşayiət olunur. Bu isə beyində xroniki iltihab proseslərinə səbəb olaraq neyronların zədələnməsinə gətirib çıxara bilər”, – deyə nevroloq bildirib.

Rena İsmayılova əlavə edib ki, pandemiyadan sonra bəzi xəstələrdə beyin zədələnmələri müşahidə olunub. Onun sözlərinə görə, əvvəldən mövcud olan koqnitiv pozuntular da bəzi insanlarda daha sürətlə irəliləyə bilər.

Mütəxəssislər COVID-19 ilə demensiya arasında mümkün əlaqənin hələ də araşdırıldığını və koronavirus infeksiyasının birbaşa Alzheimer xəstəliyinə səbəb olduğunu söyləmək üçün əlavə elmi araşdırmalara ehtiyac olduğunu vurğulayırlar.