Alimlər heyvanlarda rast gəlinən koronavirusların insan sağlamlığı üçün də potensial təhlükə yarada biləcəyini bildiriblər.

Aztibb.az "Clinical Infectious Diseases" jurnalında dərc olunan araşdırmanın nəticələrinə diqqət çəkib. 

Malayziyanın Saravak əyalətində pnevmoniya diaqnozu ilə xəstəxanaya yerləşdirilən 301 pasiyentin burun yaxması nümunələri araşdırılıb. Əksəriyyəti 5 yaşdan kiçik uşaqlardan götürülən 8 nümunədə itlərdə rast gəlinən koronavirusa bənzər yeni virus aşkarlanıb.

Əgər virusun insanlarda xəstəlik törədən yeni patogen olduğu təsdiqlənərsə, bu, insanları yoluxdurduğu məlum olan səkkizinci koronavirus növü olacaq. Daha əvvəl insanlarda xəstəlik törədən 7 koronavirus müəyyən edilmişdi və onların sonuncusu COVID-19 pandemiyasına səbəb olan SARS-CoV-2-dir.

Bununla belə, tədqiqatçılar yeni virusla insan xəstəliyi arasında hələ birbaşa əlaqə müəyyən etməyiblər. Eyni zamanda, virusun insanlar arasında yayıldığını göstərən hər hansı sübut da yoxdur.

Virusoloq Stenli Perlmanın fikrincə, koronaviruslar üzərində araşdırmalar genişləndikcə onların müxtəlif növlər arasında keçidinə dair daha çox nümunə aşkar edilə bilər.