Akademik pandemiya potensialına malik yeni virusun yaranması riskindən danışıb

Dünya yeni pandemiyanın astanasında ola bilər. Bunu Rusiya Elmlər Akademiyasının akademiki, epidemioloq Gennadi Onişenko bildirib.

Aztibb.az "Life" portalına istinadən yazır ki, onun sözlərinə görə, bu cür təhlükələrin meydana çıxma dövriliyi təxminən 10 ildir və hazırda yeni təhlükəli ştamın yaranması ehtimalının artdığı bir mərhələ müşahidə olunur.

“Pandemik ştamların meydana çıxması təxminən 10 illik dövrlə xarakterizə olunur. Bu ştamlar xəstələnmə hallarının əhəmiyyətli dərəcədə artmasına, xəstəliyin daha ağır keçməsinə və müddətinin uzanmasına səbəb olur. Nəzərə alsaq ki, belə dövrilik təxminən 10 ildir, hazırda bu cür ştamın meydana çıxmasının astanasındayıq”, – alim açıqlamasında deyib.

Akademik daha əvvəl də yeni pandemiyanın ən ehtimal olunan səbəbinin qrip virusu ola biləcəyini bildirmişdi. O, mümkün yoluxucu xəstəlik ocaqlarına hazırlıq məqsədilə epidemioloji nəzarət tədbirlərinin gücləndirilməsinə və əhalinin vaksinasiyasının artırılmasına dəfələrlə çağırış edib.