COVID-19 əvvəlki illərlə müqayisədə daha yüngül mənzərə yaratsa da, təhlükə tam aradan qalxmayıb. "The Boston Globe" nəşri yazır ki, ABŞ-ın Massaçusets ştatında payız aylarında yoluxma göstəriciləri artsa da, xəstəxanaya yerləşdirilmə və ölüm halları pandemiyanın əvvəlki illəri ilə müqayisədə xeyli aşağıdır. Buna baxmayaraq, bəzi insanlar üçün infeksiya ciddi fəsadlar yarada bilər.

Aztibb.az xəbər verir ki, "Sabah qəzetindəki yazısında professor Osman Müftüoğlunun qeyd edir ki, cəmiyyətdə immunitetin güclənməsi və müalicə imkanlarının artması COVID-19-un gedişatını dəyişib. Lakin virus xüsusilə 65 yaşdan yuxarı şəxslər, immun sistemi zəif olanlar, hamilələr, eləcə də ürək, ağciyər və böyrək xəstəliklərindən və diabetdən əziyyət çəkənlər üçün təhlükəli olaraq qalır.

İnfeksiya bu şəxslərdə mövcud xəstəlikləri ağırlaşdıra, qan şəkərinə nəzarəti çətinləşdirə, tənəffüs problemlərini gücləndirə bilər. Yaşlı insanlarda uzunmüddətli halsızlıq və fiziki gücün azalması da əzələ itkisi və yıxılma riskini artıra bilər.

Mütəxəssislər simptomlar yarandıqda, xüsusilə risk qrupuna daxil olan şəxslərin vaxtında test verməsini tövsiyə edirlər. Virusəleyhinə müalicənin zəruriliyi xəstənin yaşı, yanaşı xəstəlikləri, qəbul etdiyi dərmanlar və simptomların başlama vaxtı nəzərə alınmaqla müəyyənləşdirilir.

Qapalı məkanların havalandırılması, xəstəlik zamanı həssas insanlarla təmasın məhdudlaşdırılması və fərdi riskə uyğun peyvənd planının nəzərdən keçirilməsi də qorunmada əhəmiyyətlidir.

COVID-19 artıq əvvəlki kimi gündəlik həyatın mərkəzində olmasa da, risk qrupları üçün ehtiyat tədbirləri və vaxtında tibbi yardım hələ də vacibdir.