Koronavirus pandemiyasının qarşısının alınması məqsədilə respublikamızda həyata keçirilən vaksinasiya tədbirləri çərçivəsində Füzuli rayonunda da əhalinin COVID-19 infeksiyasına qarşı peyvənd olunması prosesi uğurla davam edir.

Aztibb.az xəbər verir ki, əhalinin peyvəndlənməsi rayon mərkəzi xəstəxanasında həyata keçirilir. Bunun üçün qeydiyyat, 2 peyvənd, 1 həkim, təcili yardım, post vaksin və gözləmə otaqları yaradılıb. İlkin mərhələdə rayona 867 doza vaksin gətirilib. Vaksinasiya kampaniyasının ilk günlərində rayonda 560 tibb işçisinə peyvənd vurulub və proses davam edir.

Qeyd edək ki, Nazirlər Kabinetinin 2021-ci il 16 yanvar tarixli Sərəncamı ilə “Azərbaycan Respublikasında COVID-19 xəstəliyi əleyhinə 2021-2022-ci illər üçün Vaksinasiya Strategiyası” təsdiq edilib. Strategiyaya uyğun olaraq vaksinasiyanın birinci mərhələsində səhiyyə işçiləri, yaşı 65-dən yuxarı olan şəxslər və hüquq-mühafizə orqanları tərəfindən əks-epidemik tədbirlərə cəlb edilən heyət peyvəndlənəcək. Strategiyanın əsas məqsədi ölkədə yayılmış koronavirus pandemiyasının qarşısının alınmasına, virusa yoluxma və ölüm səviyyəsinin aşağı salınmasına nail olmaqdır.