Çində COVID-19 infeksiyasına qarşı vaksinasiyanın ilk mərhələsi çərçivəsində xüsusi risk qrupundan olan 9 milyon nəfərə peyvənd vurulub.
Çinin Səhiyyə Məsələləri üzrə Dövlət Komitəsinin sədr müavini Cen İsin yanvarın 9-da keçirilən mətbuat konfransında bu barədə açıqlama verib. O, hökumətin şərq xalqlarının Ay təqvimi ili qeyd olunan Yeni il bayramı (11-17 fevral) tətilinədək 50 milyon nəfərə 2 dozada peyvənd vurulmasını başa çatdırmağı planlaşdırdığını deyib.
Bildirilib ki, son günlər virusun yeni yoluxma ocaqlarının aşkarlandığı Hebey vilayətində vaksinasiya prosesinin sürətləndirilməsinə qərar verilib.
Cen İsin Çində hazırlanan peyvəndlərin COVID-19-un Böyük Britaniyada tapılan yeni ştammına qarşı effektli ola biləcəyini deyib. Onun sözlərinə görə, çinli mütəxəssislər ötən il Çində aşkarlanan virus ştammı ilə Böyük Britaniyada aşkarlanan ştammı müqayisə edərkən, peyvəndin həm heyvanlarda, həm də insanlarda yaratdığı anticisimlərin virusu neytrallaşdırdığının şahidi olublar.
