Avstraliya hökuməti Kvinslend ştatının Brisben şəhərində koronavirusun yeni ştammı aşkar edildikdən sonra ölkəyə gələnlərlə bağlı epidemioloji məhdudiyyətləri daha da kəskinləşdirib.

Aztibb.az xəbər verir ki, bu barədə Avstraliyanın Baş naziri Skott Morrison məlumat verib.

Baş nazir deyib ki, bundan sonra Avstraliyaya gələn bütün aviareyslərin sərnişinləri üçün koronavirusla bağlı mənfi test arayışı məcburi olacaq.

S.Morrison əlavə edib ki, bütün aviareyslərdə uçuş ərzində sərnişinlərin tibbi maskalardan istifadəsi də məcburi olacaq. Bununla yanaşı, bütün beynəlxalq reyslərin heyət üzvləri həftədə bir dəfə koronavirus testindən keçəcəklər. Onlar üçün xüsusi izolyatorlar da açılacaq.

Eyni zamanda hakimiyyət orqanları daxili reyslərdə də qaydaları kəskinləşdiriblər və bu zaman 12 yaşadək uşaqlar istisna olmaqla qalan sərnişinlər üçün tibbi maskadan istifadə məcburi olacaq.

Bu ərəfədə Avstraliyanın baş sanitar həkimi Pol Kelli bildirib ki, Avstraliya üçün əsas risk faktoru əcnəbi səyyahlardır.

Qeyd edək ki, Avstraliyada yeni koronovirus ilk dəfə 2020-ci il yanvarın 20-də qeydə alınıb. Bu günədək burada koronavirusa yoluxanların ümumi sayı 28 min 547 nəfərə çatıb. Onlardan 909-u həyatını itirib. Epidemioloji vəziyyətlə əlaqədar regionlar arasında sərhədlər bağlanıb, Brisbendə və Sidneyin bəzi yerlərində karantin rejimi elan edilib.