“Böyük Britaniya və ABŞ vaksinlərinin ölkəyə idxalı qadağandır. Amerikalılar vaksin hazırlaya bilsəydi, koronavirusla bağlı vəziyyət belə biabırçı olmazdı”.

Bunu İranın ali rəhbəri Əli Xamenei dövlət televiziyasında çıxış edərkən bildirib.

Onun sözlərinə görə, nə Fransanın, nə Böyük Britaniyanın vaksinləri güvənlidir: “Onlara inam yoxdur. Bəzi hallarda onlar öz vaksinlərini başqaları üzərində sınamaq istəyirlər”.

Bununla belə, İran Rusiya istehsalı “Sputnik V” vaksinini əldə etmək üçün qarşı tərəflə danışıqlar aparır.

Qeyd edək ki, hazırda İran COVID-19-a qarşı öz vaksinini istehsal edir. Vaksinin cari ilin yaz aylarında hazır olacağı gözlənilir. “Kovo-İran” preparatının artıq könüllülər üzərində sınaqdan keçirildiyi də açıqlanıb.