Yaponiya hökuməti son vaxtlar koronavirus pandemiyasına yoluxanların sayı kəskin artdığına görə ölkədə fövqəladə vəziyyət rejiminin ikinci dəfə tətbiqini araşdırır.

Bu barədə Baş Nazir Yoşihide Suqa yanvarın 4-də keçirilən mətbuat konfransında bəyan edib.

Baş Nazir, həmçinin bildirib ki, hökumət fevralın 20-dən əhalinin peyvəndlənməsi prosesinə başlamağı da planlaşdırır.

Kyodo agentliyinin yaydığı məlumata görə, hökumət artıq peyvəndləmə ilə bağlı hazırlıq işlərinə başlayıb.

Xatırladaq ki, yanvarın 2-də paytaxt Tokio daxil olmaqla Yaponiyanın dörd prefekturası hökumətə COVID-19 virusunun yayılmasının qarşısını almaq üçün fövqəladə vəziyyət rejiminin tətbiqi xahişi ilə müraciət edib.

Dekabrın 31-də isə Yaponiyanın İqtisadi Bərpa naziri Yasutoşi Nişimura Nazirlər Kabinetinin koronavirusa yoluxanların artımını nəzarətə almaq üçün fövqəladə vəziyyət rejimi tətbiq ediləcəyinin mümkünlüyünü bildirib.

Yaponiyada pandemiya ilə bağlı vəziyyət noyabrdan gərginləşməyə başlayıb. Dekabrda isə sutkalıq yoluxmada və həyatını itirənlərin sayında müntəzəm artım qeydə alınıb.

“Worldometer” portalının yaydığı məlumata görə, yanvarın 4-də Yaponiyada koronavirusa yoluxanların sayı 240 min 900 nəfərə çatıb. Pandemiyanın əvvəlindən bu ölkədə koronavirusun əmələ gətirdiyi xəstəliyə görə 3548 nəfər həyatını itirib, 198 min 400 nəfər isə sağalıb.