Çin Dövlət Tibbi Məhsullar Administrasiyası “China National Biotec Group” (Sinopharm) şirkətinin yeni növ koronavirusa qarşı hazırladığı peyvəndi təsdiqləyib.

Bunu administrasiyanın sədr müavini Çen Şifey dekabrın 31-də Pekində keçirdiyi mətbuat konfransında açıqlayıb. Bildirib ki, bununla “Sinopharm”ın peyvəndinin marketinqinə icazə verilib.

Çen Şifey deyib ki, 3-cü mərhələdə kliniki sınaqların ilkin nəticələrinə əsasən, “Sinopharm”ın hazırladığı peyvəndin COVID-19 infeksiyası əleyhinə effektivliyi 79,34 faiz olub. Bu rəqəm Çin Dövlət Tibbi Məhsullar Administrasiyası ilə yanaşı Ümumdünya Səhiyyə Təşkilatının da standartlarına uyğundur. Administrasiya “Sinopharm” şirkətinə peyvəndin satışını həyata keçirməklə yanaşı, 3-cü mərhələ sınaqları və müvafiq aradşırmaları davam etdirməyi tapşırıb.