Ağcabədi rayonunda arı sancması nəticəsində 1984-cü il təvəllüdlü kişi ağır vəziyyətdə Ağcabədi Rayon Mərkəzi Xəstəxanasının Təcili tibbi yardım şöbəsinə hospitalizasiya olunub.

Yaxınlarının Aztibb.az-a verdiyi məlumata əsasən, pasiyenti boğaz nahiyəsindən arı sancıb. Nəticədə arı zəhərinə qarşı yaranan ağır allergik reaksiya səbəbindən onda IV dərəcəli anafilaktik şok inkişaf edib.

Pasiyentə Təcili tibbi yardım şöbəsində zəruri təxirəsalınmaz tibbi yardım göstərilib və aparılan müalicə tədbirləri nəticəsində vəziyyəti stabilləşdirilib. Daha sonra müvafiq tibbi nəzarət və müalicənin davam etdirilməsi məqsədilə Reanimasiya şöbəsinə köçürülüb.

Vəziyyəti yaxşılaşan pasiyent növbəti gün ambulator müalicənin davam etdirilməsi üçün evə buraxılıb.