Alimlər yüksək temperatura daha davamlı yeni plastik material hazırlayıblar. Yeni materialın istiliyə davamlılığı ənənəvi plastiklərlə müqayisədə 16 faiz artırılaraq 173 dərəcəyə çatdırılıb.

Aztibb.az-ın xarici mətbuata istinadla xəbərinə görə, tədqiqatçılar polivinilxloridin (PVC) qızdırılarkən necə parçalandığını öyrənmək üçün riyazi model hazırlayıblar. Məlum olub ki, adi plastik yüksək temperaturda tərkibindəki plastifikatoru itirir, ətraf mühitə mikrozərrəciklər buraxır və kövrəkləşir.

Problemi həll etmək üçün alimlər plastikin tərkibindəki plastifikatorun formulunu dəyişiblər. Ən yaxşı nəticə ənənəvi dioktilftalat və difenoksietiladipinatın 5:3 nisbətində qarışdırılması ilə əldə olunub.

Alimlərin fikrincə, yeni materialdan tibbi avadanlıqların, qablaşdırma məhsullarının, oyuncaqların və digər məişət əşyalarının hazırlanmasında istifadə etmək mümkündür. Yenilik məhsulların davamlılığını və istiyə qarşı müqavimətini artırmağa imkan verə bilər.