8 Noyabr - Zəfər Günü ərəfəsində Azərbaycan Tibb Universitetinin (ATU) Tələbə Həmkarlar İttifaqı Komitəsinin (THİK) təşəbbüsü və dəstəyi ilə universitetin 44 tələbəsi Vətən müharibəsinə həsr olunmuş “44” bədii filmini izləyib. 

Bu barədə Aztibb.az-a ATU-dan məlumat verilib.

Tədbirin ən diqqətçəkən və rəmzi məqamı film nümayişində iştirak edən tələbələrin sayının təsadüfi seçilməməsi olub. Belə ki, Azərbaycanın ərazi bütövlüyünün və tarixi ədalətin bərpası ilə nəticələnən 44 günlük Vətən müharibəsinə mənəvi ehtiramın ifadəsi olaraq məhz 44 ATU tələbəsi bu nümayişə qatılıb. 

ATU Tələbə Həmkarlar İttifaqı Komitəsinin təşəbbüsü ilə reallaşan bu simvolik addım 44 günlük mübarizənin qəhrəmanlıq salnaməsi ilə gənc nəslin milli yaddaşı arasında mənəvi bağ yaradıb. 44 gün davam edən tarixi müharibənin 44 tələbənin iştirakı ilə anılması tədbirə xüsusi məna və emosional çalar qatıb. 

Xalqımızın qəhrəmanlığına, Vətən uğrunda mübarizə aparan igidlərimizin şücaətinə həsr olunan “44” bədii filmi tələbələr üçün yalnız bədii ekran əsəri deyil, həm də tariximizin şanlı səhifələrini bir daha xatırlamaq, şəhidlərimizin əziz xatirəsini ehtiramla yad etmək və Zəfərin hansı fədakarlıqlar hesabına qazanıldığını bir daha dərindən dərk etmək imkanı olub. 

Zəfər Günü ərəfəsində keçirilən nümayişin əsas məqsədi gənc nəslin vətənpərvərlik ruhunda yetişməsinə töhfə vermək, milli-mənəvi dəyərlərə bağlılığı gücləndirmək və tarixi yaddaşın qorunub saxlanılmasına diqqət çəkməkdir. 

ATU Tələbə Həmkarlar İttifaqı Komitəsinin bu təşəbbüsü bir daha göstərir ki, Vətən müharibəsinin qəhrəmanlıq dərsləri gənc nəslin yaddaşında yaşamalı, Zəfər ruhu gələcək nəsillərə ötürülməlidir. 

Qeyd edək ki, tammetrajlı bədii müharibə dramı olan “44” bədii Azərbaycan tarixində ən böyük kinematoqrafik layihələrdəndir. İkinci Qarabağ müharibəsinə həsr olunmuş filmin çəkilişləri Bakı, Abşeron, Ağdam, Cəbrayıl, Füzuli, Goranboy, Gəncə, Xocavənd, Xızı, Lerik və Şuşada aparılıb. Rejissorları İsmayıl Səfərəli, Maksim Smetana, ssenari müəllifləri Anar Ələkbərov və İsmayıl İman olan film Mədəniyyət Nazirliyi, Azərbaycan Respublikasının Kino Agentliyi (ARKA) və Bakı Media Mərkəzinin dəstəyi ilə ekranlaşdırılıb.