Aztibb.az-ın xəbərinə görə, peyvəndləri zəncirvari tətbiq etməkdə məqsəd odur ki, müəyyən dövrlərdə vaksinasiyadan kənarda qalan uşaqlar revaksinasiyalar nəticəsində immunitet qazansın və yoluxucu xəstəliklərə yoluxmasın.

 

Uşaqların pediatr və müvafiq ixtisaslı həkimin yoxlanışından sonra peyvənd olunması vacibdir. Bir sıra hallarda uşağın sağlamlıq vəziyyətində hər hansı problem aşkar olunduğu halda onun peyvənd vurulması müvəqqəti olaraq ertələnir. Bu zaman xəstə uşaqlara sağaldıqdan sonra peyvənd vurulur.

 

Uşağın peyvəndlərinin əksəriyyəti 6 yaşa qədər tamamlanmış olur. Belə ki, bir çox peyvənd bir neçə dəfə, müxtəlif yaşlarda və kombinasiyalarda verilir. Peyvəndlər arasındakı interval ən azı bir ay olmalıdır. Peyvənd olunduqdan sonra individual hallarda körpədə inyeksiya yerində şişlik, ağrı və qızdırma kimi yanaşı təsirlərə rast gəlmək olar. Uşaqlarda hər hansı bir əks-reaksiya baş versə də, bilmək lazımdır ki, peyvəndlərin faydaları mümkün yan təsirlərdən qat-qat üstündür.

 

Onu da qeyd etmək lazımdır ki, ölkəmizə gətirilən bütün vaksinlər Azərbaycan Respublikası Səhiyyə Nazirliyinin Dərman Vasitələrinin Analitik Ekspertiza Mərkəzində (AEM) müayinədən keçirilir və təhlükəsizliyinə zəmanət verilir.