Azərbaycan Tibb Universitetinin (ATU) Tədris Cərrahiyyə Klinikasında “Qalxanabənzər vəzi düyünlərinin ultrasəs müayinəsində süni intellekt: Tədqiqat yanaşmaları və ilkin təcrübələrimiz” mövzusunda elmi seminar keçirilib.

 

Bu barədə Aztibb.az-a ATU-dan məlumat verilib.

 

Bildirilib ki, tədbirin əsas məqsədi süni intellekt texnologiyalarının qalxanabənzər vəzi düyünlərinin ultrasəs müayinəsində tətbiq imkanlarını, bu istiqamətdə mövcud tədqiqat yanaşmalarını və həmçinin bu mövzuda aparılan tədqiqatın ilkin təcrübələrini müzakirə etmək olub.

 

Seminarda ADA Universitetinin Mühəndislik fakültəsinin Kompüter elmləri bölməsinin müəllimi Nurəddin Sədili məruzə ilə çıxış edib. Məruzədə tibbi görüntülərin süni intellekt alqoritmləri vasitəsilə təhlili, qalxanabənzər vəzi düyünlərinin xüsusiyyətlərinin avtomatlaşdırılmış qiymətləndirilməsi və bu texnologiyaların diaqnostik prosesə inteqrasiyası perspektivlərinə toxunulub.

 

Seminar tibb və kompüter elmləri arasında multidissiplinar əməkdaşlığın əhəmiyyətini ön plana çıxarıb. Süni intellektin tibbi diaqnostikada istifadəsi, eləcə də bu sahədə gələcək birgə elmi tədqiqatların aparılması imkanları tədbirin əsas müzakirə mövzularından olub.

 

Tədbir müasir texnologiyaların klinik praktikaya tətbiqi və tibb sahəsində innovativ tədqiqat istiqamətlərinin inkişafı baxımından əhəmiyyətli elmi təşəbbüs kimi dəyərləndirilib.

 

Seminar BMT-nin DİM 3 — Sağlamlıq və rifah məqsədinə töhvə vermək məqsədi daşıyır. Belə ki, süni intellektin tibbi diaqnostikada tətbiq imkanlarının araşdırılması səhiyyə xidmətlərinin təkmilləşdirilməsi istiqamətini dəstəkləyir.