Azərbaycan Tibb Universiteti (ATU),  Azərbaycan İdman Akademiyası (ASA), və Çexiyanın Karlov Universiteti arasında üçtərəfli görüş keçirilib.

Bu barədə Aztibb.az-a ATU-dan bildirilib.

Qeyd olunub ki, Karlov Universitetində keçirilən görüşdə Azərbaycan Tibb Universitetinin beynəlxalq əlaqələr üzrə prorektoru, professor Orxan İsayev, ASA-nın tədris işləri üzrə prorektoru Ülkər Babayeva və Karlov Universitetinin nümayəndələri iştirak ediblər. Tərəflər idman elmləri və reabilitasiya sahəsində akademik əlaqələrin genişləndirilməsi, ali təhsil müəssisələri arasında əməkdaşlığın inkişaf perspektivləri, təcrübə mübadiləsi, bakalavriat təhsil səviyyəsi üzrə “Fizioterapiya” ixtisasının məzmunu və tədrisinin təşkili, eləcə də gələcəkdə birgə diplom proqramının yaradılması məsələlərini müzakirə ediblər.

Görüşdə tədris prosesində beynəlxalq təcrübənin tətbiqi, tələbələrin nəzəri biliklərinin praktiki bacarıqlarla möhkəmləndirilməsi imkanları diqqət mərkəzində olub.

Karlov Universitetinin Beynəlxalq əlaqələr ofisinin direktoru Silvi Boumova ilə keçirilən ayrıca görüşdə isə beynəlxalq əməkdaşlığın genişləndirilməsi və birgə fəaliyyət imkanları ətrafında fikir mübadiləsi aparılıb.

Bu əməkdaşlıq ali təhsilin keyfiyyətinin artırılması, beynəlxalq təcrübə mübadiləsinin genişləndirilməsi, eyni zamanda fizioterapiya və reabilitasiya sahəsində əməkdaşlığın inkişafı baxımından BMT-nin Dayanıqlı İnkişaf Məqsədlərindən 3-cü (Yaxşı sağlamlıq və rifah), 4-cü (Keyfiyyətli təhsil) və 17-ci (Məqsədlər üçün tərəfdaşlıq) məqsədlərinə töhfə verir.