Azərbaycan Tibb Universitetinin (ATU) əməkdaşları – Ümumi cərrahlıq kafedrasının professoru Novruz Hacıyev və kafedranın dosenti, tibb elmləri doktoru Elman Tağısoy Cənubi Koreyanın Seul şəhərində keçirilən “LMCE 2026 & 67 KSLM” beynəlxalq elmi toplantısında iştirak ediblər. 

Bu barədə Aztibb.az-a ATU-dan məlumat verilib.

Bildirilib ki, N.Hacıyev E.Tağısoyun da həmmüəllifi olduğu “Creation of Next-Generation Intelligent Laboratories in Azerbaijan: Challenges and Development Prospects” (“Azərbaycanda yeni nəsil intellektual laboratoriyaların yaradılması: çağırışlar və inkişaf perspektivləri”) mövzusunda məruzə ilə çıxış edib. Məruzədə Azərbaycanda müasir intellektual laboratoriyaların yaradılması, bu sahədə mövcud çağırışlar və inkişaf perspektivləri diqqətə çatdırılıb. 

Professor, həmçinin, “The Importance of NLR and SIRI in Acute Cholecystitis” (“Kəskin xolesistitdə NLR və SIRI göstəricilərinin əhəmiyyəti”) adlı poster məruzə təqdim edib. Məruzədə kəskin xolesistitin qiymətləndirilməsində iltihabi göstəricilərin əhəmiyyəti ilə bağlı tədqiqat mövzusu önə çıxarılıb. 

ATU əməkdaşları tərəfindən beynəlxalq elmi toplantıda təqdim olunan mövzular Birləşmiş Millətlər Təşkilatının Dayanıqlı İnkişaf Məqsədlərindən 3-cü məqsəd – “Sağlamlıq və rifah” və 9-cu məqsəd – “Sənaye, innovasiya və infrastruktur” ilə uzlaşır. Belə ki, kəskin xolesistitin qiymətləndirilməsinə dair tədqiqat səhiyyə sahəsində elmi biliklərin inkişafı ilə, intellektual laboratoriyaların yaradılması mövzusu isə innovativ elmi infrastrukturun təşviqi ilə əlaqəlidir. Bu baxımdan, ATU-nun apardığı tədqiqatlar DİM-lərə öz töhfəsini verir.