Azərbaycan Tibb Universitetinin (ATU) əməkdaşları Moskvada keçirilən Beynəlxalq “Uşaqların sağlamlığı – Rusiyanın milli prioriteti” II Ümumrusiya Forumunda Azərbaycanı təmsil ediblər.

ATU-dan Aztibb.az-a bildirilib ki, Rusiya Federasiyası Səhiyyə Nazirliyinin “Uşaqların Sağlamlığı üzrə Milli Tibbi Tədqiqat Mərkəzi”nin təşkilatçılığı ilə baş tutan tədbirdə pediatriya, uşaq və yeniyetmələrin gigiyenası, profilaktik tibb, məktəb sağlamlığı, qidalanma və digər aktual istiqamətlər üzrə elmi-praktik müzakirələr aparılıb.

Forum çərçivəsində keçirilən “Uşaq və yeniyetmələrin gigiyenası: tarix və müasirlik” konfransında ATU-nun Uşaq-yeniyetmələrin sağlamlığı və əmək sağlamlığı kafedrasının müdiri, dosent Şəhla Balayeva “Şəhər yaşıl məkanlarının uşaqların psixi sağlamlığına təsiri” mövzusunda məruzə ilə çıxış edib.

Məruzədə şəhər yaşıl məkanlarının uşaqların psixi sağlamlığında rolu Dayanıqlı İnkişaf Məqsədləri – DİM 3 (Yaxşı səhiyyə və rifah), DİM 9 (Sənaye, innovasiya və infrastruktur) və DİM 11 (Dayanıqlı şəhərlər və icmalar) kontekstində təqdim olunub.

Konfransda ATU-nun dosenti Zöhrə İsmayılovanın yeniyetmələr arasında zərərli vərdişlər və riskli davranışların yayılmasına həsr olunmuş onlayn təqdimatı da dinlənilib. Mövzu DİM 3 – Yaxşı səhiyyə və rifah məqsədi ilə əlaqələndirilib.

Səfər çərçivəsində ATU nümayəndələri Rusiya Federasiyasının müxtəlif regionlarından və Belarusdan olan uşaq və yeniyetmələrin sağlamlığı və gigiyenası üzrə mütəxəssislərlə görüşlər keçiriblər. Görüşlərdə elmi əməkdaşlıq, uşaqların təhsil və yaşayış mühitinin sağlamlığa təsiri, sağlamlıq risklərinin erkən aşkarlanması və profilaktik yanaşmaların inkişafı istiqamətində fikir mübadiləsi aparılıb.

ATU əməkdaşlarının beynəlxalq elmi platformada təqdim etdiyi tədqiqat istiqamətləri uşaq sağlamlığının qorunması, profilaktikanın gücləndirilməsi və sağlam gələcək nəsillərin formalaşdırılması ilə bağlı aktual məsələləri gündəmə gətirib.