Klinikadan Aztibb.az-a bildirilib ki, pasiyentdə uşaqlıq sallanması və sidik saxlaya bilməmə problemi müəyyən edilib. Pasiyentə vaginal yolla, minimal invaziv yanaşma tətbiq edilməklə uşaqlığın xaric edilməsi və sidik kisəsinin yuxarı qaldırılması əməliyyatı həyata keçirilib. Əməliyyat zamanı çanaq orqanlarının anatomik dəstəyi də bərpa olunub.

 

Tədris Cərrahiyyə Klinikasının II Mama-ginekologiya şöbəsinin müdiri Turab Cabaxışov bildirib ki, uşaqlıq sallanmasına əsasən 53 yaşdan yuxarı qadınlarda rast gəlinir. Daha gənc yaşlarda bu patologiya nadir hallarda müşahidə olunur və ağır doğuşlar kimi amillərlə əlaqəli ola bilər.

 

Həkimin sözlərinə görə, tətbiq olunan cərrahi üsuldan sonra uşaqlıq sallanmasının təkrarlanma riski olduqca aşağıdır. Əməliyyat zamanı uşaqlıq və uşaqlıq yolu xaric edilir, eyni zamanda sidik kisəsi və düz bağırsağın anatomik vəziyyəti nəzərə alınaraq çanaq dibi strukturlarının dəstəyi bərpa olunur.

 

“Bu üsuldan sonra sallanmanın təkrarlanma ehtimalı demək olar ki, yoxdur. Çünki uşaqlıq yolu da çıxarılır və əvvəlki kimi sallanacaq orqan qalmır. Əməliyyat zamanı sidik kisəsi və düz bağırsağın anatomik vəziyyəti də nəzərə alınaraq çanaq dibi strukturlarının dəstəyi bərpa edilir”, deyə Turab Cabaxışov qeyd edib.

 

Qeyd edək ki, pasiyent daha əvvəl ATU-nun Tədris Cərrahiyyə Klinikasının Transplantologiya şöbəsinin müdiri Anar Namazov tərəfindən böyrək transplantasiyası əməliyyatı keçirib.