Azərbaycan Tibb Universitetinin (ATU) həkim-rezidentlərinin fəal iştirakı ilə hazırlanmış növbəti elmi tədqiqat işi pediatriya sahəsində beynəlxalq nüfuzlu, “Web of Science” (SCIE) bazasında indekslənən “The Turkish Journal of Pediatrics” jurnalında (Q3) dərc olunub. 

Universitetdən Aztibb.az-a bildirilib ki, “Genotype–phenotype divergence in pediatric familial Mediterranean fever across two closely related populations: a Türkiye–Azerbaijan comparison” (“Yaxın qohum iki populyasiyada pediatrik Ailəvi Aralıq Dənizi Qızdırmasında genotip-fenotip fərqliliyi: Türkiyə-Azərbaycan müqayisəsi”) adlı məqalə Türkiyə və Azərbaycanda uşaqlarda Ailəvi Aralıq Dənizi Qızdırmasının (FMF) klinik və genetik xüsusiyyətlərinin müqayisəsinə həsr olunub. 

Tədqiqat çərçivəsində ümumilikdə 549 pediatrik FMF xəstəsinin, o cümlədən 72 azərbaycanlı və 477 türkiyəli pasiyentin klinik və genetik göstəriciləri təhlil edilib. Araşdırmada MEFV gen mutasiyaları, xəstəliyin klinik xüsusiyyətləri və kolxisin müalicəsinə cavab göstəriciləri müqayisəli şəkildə öyrənilib.

Tədqiqatın aparılmasında və məlumatların toplanılmasında ATU rezidentləri Gövhər Verdiyeva və Leyla Sahratova ilə yanaşı, müxtəlif tibb müəssisələrini təmsil edən digər tədqiqatçılar da iştirak ediblər.