Çinin texnologiya nəhəngi Huawei diabetin idarə olunmasında yeni mərhələyə hazırlaşaraq III sinif tibbi cihaz təsnifatına malik ilk davamlı qlükoza monitorinq sistemi kimi təqdim etdiyi Sense G1 modelini elan edib.
Aztibb.az "China Daily" nəşrinə istinadən yazır ki, şirkətin üçillik elmi-tədqiqat və təkmilləşdirmə (R&D) prosesi nəticəsində hazırladığı cihaz diabet xəstələrinin qlükoza səviyyəsini yüksək dəqiqliklə və uzun müddət izləmək üçün nəzərdə tutulub.
Yeni cihazın əsas texniki xüsusiyyətləri aşağıdakılardır:
Ölçmə mexanizmi: Huawei Sense G1 qolun yuxarı-arxa hissəsinə yerləşdirilən dairəvi sensor və dərialtı mikoiynə sistemi vasitəsilə toxumaarası mayedəki qlükoza səviyyəsini ölçür.
Ölçmə dəqiqliyi: Laboratoriya məlumatlarına əsasən, cihazın ölçmələrində sapma göstəricisinin 10 faizdən aşağı olduğu bildirilir. Sistem qanda qlükoza səviyyəsindəki dəyişiklikləri 5-15 dəqiqəlik gecikmə ilə izləyir.
İstifadə müddəti: Bir sensorla 16 günədək fasiləsiz monitorinq aparmaq mümkündür.
Tibbi cihaz təsnifatı: Sistem yüksək risk qrupuna aid olan III sinif tibbi cihaz kateqoriyasında təqdim edilir və bu kateqoriyaya aid məhsullar ciddi tənzimləyici nəzarətə tabedir.
Huawei-nin bu addımı davamlı qlükoza monitorinqi texnologiyaları bazarında rəqabəti gücləndirə bilər. Bununla belə, cihazın beynəlxalq bazarlarda satışa çıxarılacağı tarix hələ açıqlanmayıb.
Yeni texnologiya diabetli şəxslərin gündəlik qlükoza nəzarətini asanlaşdırmaq baxımından maraq doğursa da, onun klinik effektivliyi, ölçmə dəqiqliyi və müxtəlif xəstə qruplarında istifadəyə yararlılığı müvafiq klinik məlumatlar əsasında qiymətləndirilməlidir.

