Sağlamlığı mütəxəssisi Gül Ergör bildirib ki, qrip kimi xəstəliklər tənəffüs yolu xəstəlikləri olduğu üçün məktəblərdə və insanların sıx olduğu mühitlərdə bu xəstəliyə yoluxma riskimiz artır.

Aztibb.az “Haberturk” saytına istinadən xəbər verir ki, mövsümi keçidlər və temperaturun aşağı düşməsi ilə bu günlərdə qripə yoluxma hallarında artım müşahidə olunur.

"Maska qoruyucu amildir. Pandemiya dövründə olduğu kimi hər kəsin geyinməsinə ehtiyac yoxdur, ancaq xəstəliyin əlamətlərini görən insanlara onu taxaraq yoluxma riskini azaltmağı tövsiyə edirik", – deyə həkim qeyd edib.

Burun axıntısı, qızdırma, boğaz ağrısı və öskürək ilə ortaya çıxan qrip infeksiyası ictimai yerlərdə sürətlə yayılır. Mütəxəssislər bildirirlər ki, qrip bədən müqaviməti aşağı olan insanlarda, xroniki xəstəlikləri olanlarda, yaşlılarda və körpələrdə daha ağır keçə bilər.

Digər tərəfdən mütəxəssislər məktəblərdə uşaqlar arasında qripin sürətlə yayıldığına və sinif otağının vaxtaşırı havalandırılmasına, uşaqların əllərini tez-tez yumasına diqqət çəkirlər.

Qrip peyvəndinin əhəmiyyətini vurğulayan ekspert belə davam edib: “İnkişaf etmiş ölkələr qrip peyvəndini bütün yaş qruplarına tövsiyə edir. Əksər ölkələrdə isə 65 yaşdan yuxarı insanlara, xroniki xəstəlikləri olanlara və tibb işçilərinə tövsiyə edilir”.