Soçi Elm və Texnologiya Universitetinin alimləri araşdırmalar zamanı müəyyən ediblər ki, dovşan hüceyrələrində yayılan miksoma virusu xərçəng şişləri ilə mübarizədə effektivdir.
Aztibb.az "RİA Novosti"yə istinadən xəbər verir ki, gələn il dəyişdirilmiş virus transgen siçanlar üzərində sınaqdan keçiriləcək.
Miksoma virusu poksivirusdur və insanlar üçün təhlükə yaratmır və yalnız dovşan hüceyrələrində yayılır. Bununla belə, virus xərçəng hüceyrələrini təsirli şəkildə yoluxdurur və öldürür.
İndiyədək laboratoriyada hüceyrə modelləri və siçanlar üzərində təcrübələr aparılıb.
Tədqiqat çərçivəsində mütəxəssislər siçanlara xərçəng hüceyrələrini yeridib, 8-9 gün ərzində onların üzərində qoz böyüklüyündə şiş yetişdirib, sonra isə siçanları miksoma virusu ilə yoluxdurublar. Tədricən şiş azalıb.