İspaniyalı tədqiqatçılar müəyyən ediblər ki, yalnız iki mikroelementin qəbulunun artması qadınlarda idrak pozğunluğunun inkişaf riskini azalda bilər. Bunun sirri dəmir və manqan istifadəsindədir.

Aztibb.az “Neva Today” internet qəzetinə istinadən xəbər verir ki, alimlər araşdırma aparıblar və müəyyən ediblər ki, dəmir və manqan qəbulunun artması qadınlarda koqnitiv pozğunluq riskinin azalması ilə əlaqələndirilir.

Tədqiqatçıların qeyd etdiyi kimi, demensiya tez-tez yüngül idrak pozğunluğu - qavrayışın pisləşməsi, yaddaş problemləri və yorğunluğun artması ilə başlayır. Zamanla vəziyyət pisləşir, həyat keyfiyyətinin düşməsinə səbəb olur.

Tədqiqatda 201 könüllü iştirak edib. Alimlər eksperiment başlamazdan üç gün əvvəl onların antropometrik məlumatlarını, fiziki aktivlik səviyyəsini və pəhrizini təhlil ediblər.

Sonra hər kəs idrak qabiliyyətlərini qiymətləndirmək üçün test edib. Məlum olub ki, müntəzəm olaraq tərkibində yüksək miqdarda manqan və dəmir olan qidalar (ət, tərəvəz, yumurta) qəbul edən qadınlar testlərdə daha yaxşı nəticə göstərib.

Eyni zamanda kişilərdə bu mikroelementlərlə idrak qabiliyyətləri arasında heç bir əlaqə aşkar edilməyib. Tədqiqatçıların fikrincə, dəmir və manqanın beyin fəaliyyətinə təsir mexanizmləri ilə bağlı əlavə araşdırmalara ehtiyac var.