Hemangioma qan damarlarının anormal böyüməsi nəticəsində yaranan xərçəngsiz (xoşxassəli) şişdir.

Aztibb.az xəbər verir ki, ümumi cərrah Toğrul Məhərrəmovun bildirdiyinə görə, hemangiomalar bədənin hər yerində baş verə bilər, lakin ən çox üz və boyunda olur.

“Hemangiomalara uşaqlarda çox sıx rast gəlmək olur. Hemangiomalar üçün müəyyən inkişaf dinamikası xarakterdir. Uşaq doğulduqdan sonra ilk həftələrdə aktiv böyümə fazası başlayır və 5-6 aya (bəzən 9-12 aya) qədər davam edir. 2-ci dövr stabilləşmə dövrüdür (böyümə dayanır). 1 yaşdan sonra involyusiya dövrü başlayır (geriyə inkişaf)”, – deyə həkim qeyd edib.

Hemangiomanın orqanizm üçün təhlükəli olub-olmaması onun yerləşdiyi yerdən, ölçüsündən və ətraf sahəsinə göstərdiyi təsirdən asılıdır. Ölçüləri kiçik və üst hissəsi düz olan hemangioma tam zərərsiz hesab edilir.

Bəzən hemangiomaların ölçüsü sürətlə artır, yandakı dəri toxuması dartılmağa məcbur qalır. Belə hemangiomaların daxili toxumaları bərk kavernozdan ibarət olur. Bu cür hemangiomalar ətrafdakı toxumalar da yayılır və hətta sümük toxumasının defotmasiyasına səbəb ola bilir. Bu zaman hemangioma xəstənin həyatı üçün təhlükə yarada bilər.