Pilorostenoz mədə ilə onikibarmaq bağırsaq arasındakı dəliyin müxtəlif səbəblərdən daralmasıdır.

Aztibb.az xəbər verir ki, ümumi cərrah Toğrul Məhərrəmov pilorostenozun mədə anomaliyası, dəha dəqiq desək, onun pilorik (çıxış) şöbəsinin inkişaf qüsuru olduğunu deyib.

Qeyd edib ki, bunun nəticəsində pilorik çıxışın keçiriciliciyi pozulur və qidanın evakuasiyası çətinləşir.

“Anadangəlmə pilorostenoza pediatriyada kifayət qədər tez-tez rast gəlinir. Statistikaya görə, yeni doğulmuş hər 300 uşaqdan biri bu xəstəlikdən əziyyət çəkir. Oğlanlarda qızlara nisbətən 4 dəfə çox qeydə alınır. Anadangəlmə pilorostenoz yeni doğulmuşlarda ən çox rast gəlinən cərrahi patologiyadır və təcili müdaxilə tələb edir”, - deyə həkim bildirib.

Həkimin sözlərinə görə, yetkin fərdlərdə pilorostenozun ən mühüm əlaməti yeməkdən bir neçə saat sonra baş verən həzm olunmamış qidaların qaytarılmasıdır.

Müalicəsinə gəldikdə isə həkim pilorostenozun təcili cərrahi müdaxilə tələb edən xəstəliklərdən olduğunu deyib.