İsveç alimləri müəyyən ediblər ki, depressiya və stressdən əziyyət çəkən insanların Alzheimer xəstəliyinə tutulma ehtimalı bu cür psixi pozuntuları olmayanlara nisbətən iki dəfə çoxdur.

Aztibb.az "The Mirror”a istinadən xəbər verir ki, Karolinska İnstitutunun mütəxəssisləri səkkiz il davam edən araşdırmadan sonra bu qənaətə gəliblər.

İsveç alimləri 18 yaşdan 65 yaşa qədər 44 mindən çox xəstə haqqında məlumatları öyrənmək üçün illər sərf ediblər. Mütəxəssislər yaş, cins, ürək-damar xəstəliklərinin və şəkərli diabetin mövcudluğunu nəzərə alaraq müxtəlif qruplar üzrə müqayisəli təhlil aparıblar.

Nəticə etibarı ilə tədqiqatçılar belə qənaətə gəliblər ki, stress və depressiyadan əziyyət çəkən insanlarda koqnitiv pozğunluqların və müxtəlif növ demansların inkişaf riski artır.

Üstəlik, xroniki stress və ya depressiya diaqnozu qoyulan xəstələrdə Alzheimer xəstəliyinə tutulma ehtimalı, bu cür psixi xəstəlikləri yaşamayanlarla müqayisədə iki dəfə çox idi.

Bu arada ABŞ alimləri isə xolesterinin səviyyəsi ilə demensiyanın inkişafı arasında əlaqəyə dair araşdırma aparıblar.